Nəsimi rayonunda 1 iyun Uşaqların Beynəlxalq Müdafiəsi Günü münasibəti ilə növbəti bayram tədbiri keçirildi

01 iyun 2018 | 16:00

Nəsimi Rayon İcra Hakimiyyətinin təşkilatçılığı ilə Müasir İnnovasiyalar Liseyi tərəfindən Səməd Vurğun adına bağda 1 iyun Uşaqların Beynəlxalq Müdafiəsi Günü münasibəti ilə bayram tədbiri keçirildi.

Tədbir Azərbaycan Respublikasının dövlət himni ilə açıldı. Tədbirdə Nəsimi rayon İcra Hakimiyyəti Başçısının birinci müavini Gülarə Verdiyeva, Odlar Yurdu Universitetinin rektoru, professor Əhməd Vəliyev tədbirdə iştirak edən şagirdləri bayram münasibəti ilə təbrik etdilər.

Bayram tədbirində Müasir İnnovasiyalar Liseyinin direktoru Sevinc Əliyeva çıxış edərək Azərbaycan Xalq Cümhuriyyətin 100 illiyi ilə əlaqədar təşkil edilmiş “Bilik yarışı-4” haqqında məlumat verərək bildirdi ki, həmin yarışda Azərbaycan bölməsi üzrə IV sinif şagirdlərindən seçilmiş 500 nəfər əlaçı iştirak etmişdir. Həmin müsabiqənin qalibləri tədbir iştirakçıları tərəfindən təbrik edildi. Tədbir Müasir İnnovasiyalar Liseyinin şagirdlərinin hazırladıqları ədəbi-bədii kompozisiya ilə davam etdirildi.

Qonaqlar Azərkitab nəşr evinin təşkil etdiyi kitab sərgisi və satışı ilə yaxından tanış oldular.

Keçidlər