Qəhrəman ordumuzun uğurlu əməliyyatı davam edir. Qarabağ Azərbaycandır !

Azərbaycan Respublikasının Prezidenti cənab İlham Əliyev Cəbrayılın işğaldan azad olunan daha bir neçə kəndinin və strateji yüksəkliyinin adını açıqlayaraq Azərbaycan ordusu tərəfindən Şıxəli Ağalı, Sarıcalı, Məzrə kəndlərini və müxtəlif istiqamətlərdə yerləşən bir neçə yüksəkliyin azad edildiyini bildirməklə tariximizə növbəti şanlı səhifə yazmışdır. Müqəddəs Vətən torpaqlarımız Ermənistan ordusunun işğalından azad edilir.

Döyüş bölgələrindən şad xəbərlər alırıq. Azərbaycan Ordusunun zəfər yürüşləri hər bir azərbaycanlının qəlbini dağa döndərir. Qürur, fəxr, fərəh hissləri yaşayan xalqımız döyüş bölgələrindən yeni qələbə xəbərləri gözləyir.

Mənfur düşmən yenə öz xislətini göstərir, yaşayış evlərimizi, məktəblərimizi nişan alır. Azərbaycanın mülki əhalisi arasında həlak olanlar var. Ancaq vəziyyətin mürəkkəbliyi, düşmənin namərdliyi yerli sakinlərin gözünü qorxutmur. Hər kəs öz evində, öz yurdunda möhkəm dayanıb.

Bu günlərdə hər birimizi qürurlandıran, ümidləndirən məqamlar çoxdur. Bunlardan ən ümdəsi ölkəmizdə birliyin, bərabərliyin olmasıdır. Hər bir Azərbaycan vətəndaşı dövlət başçısı, Silahlı Qüvvələrin Ali Baş Komandanı cənab İlham Əliyevin əmrinə müntəzirdir.

Ölkəmizin hər yerində bu günlər döyüş əhvali-ruhiyyəsi, qələbə əzmi hökm sürür.

Əli silah tutan, döyüş qabiliyyətli hər kəs cəbhədə, düşmənə layiqli cavab verən döyüşçülərimizin sırasında olmağı özünə şərəf bilir. Çünki bilirik ki, biz öz torpağımız uğrunda döyüşürük.

Dövlət başçısı bu münaqişədə bizim istədiyimizə nail olacağımıza, haqq-ədalətin öz yerini tapacağına və Azərbaycanın öz ərazi bütövlüyünü bərpa edəcəyinə, uzun illər ərzində məcburi köçkün kimi yaşayan soydaşlarımızın öz doğma dədə-baba torpaqlarına qayıdacaqlarına əminliyini ifadə edib.  Azərbaycan Ordusunun keçirdiyi uğurlu əməliyyat nəticəsində strateji yüksəkliklər, bir neçə yaşayış məntəqəsi işğalçılardan azad edilib. Hələ də Ermənistan ordusunun işğalında qalan Vətən torpaqlarımızı da bu xoş aqibət gözləyir.

            Azərbaycan Ordusunun zəfər yürüşü bizi qələbəyə aparır!