Nəsimi rayonunda ulu öndərin doğum günü ilə əlaqədar növbəti tədbir
Nəsimi rayonunda ulu öndərimiz Heydər Əliyevin anadan olmasının 92-ci ildönümü ilə bağlı tədbirlər silsiləsi davam edir. Bu sıradan növbəti tədbir ümummilli liderimizin xatirəsinə həsr olunmuş idman yarışlarının yekunları ilə bağlı mərasim olmuşdur.
Tədbiri Nəsimi Rayon İcra Hakimiyyətinin başçısı Nəsib Məhəməliyev açaraq bildirdi ki, hər il may ayında ölkəmizdə ümummilli liderimiz, müstəqil Azərbaycan dövlətinin qurucusu və xalqımızın xilaskarı Heydər Əliyevin doğum günü ilə əlaqədar təntənəli mərasimlər və müxtəlif tədbirlər keçirilir. Bununla xalqımız öz dahi rəhbəri qarşısında mənəvi borcunu yerinə yetirir və ona dərin minnətdarlığını ifadə edir.
Millətin gələcəyi olan gənclərin yaxşı təhsil almaları, mənəvi və fiziki cəhətdən sağlam olmaları ulu öndərimiz üçün həmişə böyük önəm daşımışdır. Ölkəmizdə idmanın inkişafına böyük diqqət verildiyini vurğulayan Nəsib Məhəməliyev Bakıda I Avropa Oyunlarının yüksək səviyyədə keçiriləcəyinə əmin olduğunu bildirdi.
Sonra yarışların qaliblərinin adları açıqlandı. 111 saylı tam orta məktəb futbol, 164 saylı tam orta məktəb basketbol, 6 saylı İxtisaslaşdırılmış Olimpiya Ehtiyatları Güləş Məktəbi güləş, 1 saylı İxtisaslaşdırılmış Olimpiya Oyunları Şahmat Məktəbi şahmat, 54 saylı tam orta məktəb voleybol, 12 saylı gənclər və idman məktəbi taekvando və həndbol, 23 və 164 saylı tam orta məktəblər “Şahin” hərbi-idman yarışlarının qalibi olmuşlar. Onlara diplom və hədiyyələr verilmişdir.
Mərasimdə məktəblilərin ifasında dünya xalqlarının rəqsləri nümayiş etdirilmişdir. Məharətlə ifa edilmiş şux rəqslər hamıda xoş ovqat yaratdı.
