Fövqəladə Hallar Nazirliyi Bakı Regional Mərkəzinin əməkdaşları Nəsimi rayon 19 saylı tam orta məktəbdə tədbir keçirmişlər.

11 noyabr 2015-ci il tarixdə Nəsimi rayonundakı M.Hüseynzadə adına tam orta məktəbdə Fövqəladə Hallar Nazirliyinin yaradılmasının  10 illiyinə  həsr edilmiş tədbirlər çərçivəsində “Fövqəladə hallarda özünü necə aparmalı” mövzusunda  maarifləndirmə tədbiri keçirilmişdir. Tədbirdə Fövqəladə Hallar Nazirliyi  Bakı Regional Mərkəzinin əməkdaşları, Nəsimi rayon İcra Hakimiyyətinin nümayəndələri və digər qonaqlar iştirak etmişdilər.

Tədbirin akt zalında keçirilən nəzəri hissəsini  məktəbin direktoru Akif Əliyev  açaraq qloballaşan müasir dünyada təbii fövqəladə  hallar zamanı şagirdlərin özlərini necə aparmaları barədə  nəzəri və praktiki bacarıqlara malik olmasının zəruriliyini qeyd etmişdir. Sonra Bakı Regional Mərkəzinin əməkdaşları “Fövqəladə halların təsnifatı”, “Kollektiv mühafizə qurğuları”, “Təbii fövqəladə hallar zamanı nə etməli”,”Yanğın-partlayış və nəqliyyat qəzası zamanı nə etməli” və s. mövzularda təqdimatlar etmişlər. VII sinif şagirdlərinin göstərdiyi “Zəlzələ” səhnəciyi, IV sinif şagirdlərinin ədəbi-bədii kompozisiyası şagird və  qonaqların  alqışlari ilə qarşılanmışdır.

Tədbirin praktiki hissəsi məktəbin həyətində davam etdirilmişdir. Bakı regional Mərkəzinin  əməkdaşları tərəfindən Mersedes-Benz Sprinter xüsusi təyinatlı xilasetmə avtomobili, fərdi mühafizə  vasitələri, radiasiya, kimyəvi kəşfiyyat və dozimetrik nəzarət cihazları, fövqəladə hallarda ilk tibbi yardım qaydaları  praktiki olaraq nümayiş etdirilmişdir.