Azərbaycan Respublikasının Birinci vitse-prezidenti Mehriban xanım Əliyevaya.

Hörmətli Mehriban xanım!

Sizi - Azərbaycanın ictimai-siyasi həyatında müstəsna xidmətləri olan, ölkəmizdə milli dövlətçilik institutunun formalaşmasına böyük töhfələr verən, görkəmli fəaliyyəti ilə dünya səviyyəsində təqdir edilən xadimi Nəsimi rayon ictimaiyyəti adından Ad gününüz münasibətilə səmimi-qəlbdən təbrik edirik.

Azərbaycan bu gün qüdrəti gündən-günə artan etibarlı tərəfdaş kimi dünyada yüksək nüfuza malik olan ölkəyə, regionun bütün siyasi və iqtisadi məsələlərinin həllində əvəzolunmaz iştirakçıya və əsas söz sahibinə çevrilmişdir.

Siz Möhtərəm Prezidentimiz cənab İlham Əliyevlə çiyin-çiyinə çalışaraq, ölkəmizin dinamik inkişafı istiqamətində görülən işlərə ciddi töhfələr verirsiniz. Sizin irəli sürdüyünüz təşəbbüslər dövlətlə vətəndaş birliyinin təmin edilməsində vacib əhəmiyyət daşıyır.

44 günlük tarixi Qələbə Azərbaycan xalqının böyük milli potensialını üzə çıxardı. Siz bu şərəfli dönəmdə Müzəffər Ali Baş Komandanın ən sadiq silahdaşı kimi yorulmaz fəaliyyət göstərərək xalqımızın ədalətli mübarizəsi barədə həqiqətləri dünya ictimaiyyətinin diqqətinə çatdırmış, vətənpərvər çağırış və müraciətlərinizlə hər birimizi milli maraqlarımız naminə düşmənlə mümkün platformalarda mübarizəyə səfərbər etmisiniz.

Bütün bunlar dünyada tanınan böyük şəxsiyyət, nüfuzlu ictimai-siyasi xadim olaraq Azərbaycanın birinci xanımının milli ziyalılıqda yeni bir tarixi örnək yaratmasının da təbii və coşğun qaynağıdır.

Xalq Sizi sevir və Sizə inanır. Ona görə ki, məhz Sizin sayənizdə cəmiyyətin sosial həyatında xeyriyyəçilik ənənələri canlanıbdır. Siz insanlara xeyirxahlığa meyil, köməyə ehtiyacı olana yardım əlini uzatmaq kimi hiss və bacarıqları aşılayıbsınız. Sizin - “Xeyriyyəçilik, insansevərlik, mərhəmət Azərbaycan xalqının mentalitetinə, mədəniyyətinə, əsrlər boyu formalaşan ənənələrimizə xas olan ən gözəl keyfiyyətlərdən biridir və biz bu gün Heydər Əliyev Fondu olaraq ənənələri davam etdirməyə çalışırıq” sözləriniz xeyriyyəçiliyin həyatınızın kredosuna çevrildiyini bir daha təsdiqləyir.

Bu da bir həqiqətdir ki, insanlara bağlılıq Sizin daxilinizdən, mənəvi dünyanızdan, xoş münasibətinizdən irəli gəlir. Sizin xidmətlərinizin sevinci minlərlə insanın ömür səhifəsinə yazılıb, ailələrə səadət bəxş edib, sosial qayğıya ehtiyacı olanlara həyat eşqi verib, onların qəlbində işıqlı sabaha inam yaradıbdır.

UNESCO və ISESCO-nun xoşməramlı səfiri kimi çoxşaxəli fəaliyyətiniz, ölkəmizin xaricdə təbliği istiqamətində atdığınız addımlar Azərbaycana böyük dividendlər qazandırıbdır. Sizin nəcib, xeyirxah missiyanızın bəhrələri artıq özünü dünyanın ayrı-ayrı məkanlarında göstərməkdədir. Siz Azərbaycanın birinci xanımı və Birinci vitse-prezidenti kimi milli səviyyədəki işləriniz ilə dünya miqyasındakı işlərinizi uyğunlaşdıraraq bu əsasda bütün dünyada böyük nüfuz qazanıbsınız.

Bir daha Sizi - xalqımızın xoşbəxt gələcəyi, dövlətimizin möhkəmliyinin, müstəqilliyinin, əbədiliyinin və dönməzliyinin təmin olunması üçün Möhtərəm Prezidentimizlə birlikdə çalışan görkəmli dövlət xadimini - Ad gününüz münasibətilə təbrik etməkdən böyük şərəf duyur, Sizə dəyərli ictimai-siyasi fəaliyyətinizdə böyük nailiyyətlər, daim firavanlıq, uzun ömür, cansağlığı diləyirik.