Nəsimi rayon İcra Hakimiyyətinin başçısı səyyar qəbul keçirdi
Nəsimi rayon İcra Hakimiyyətinin başçısı təsdiq edilmiş qrafikə uyğun olaraq 1 nömrəli Sahə İnzibati Ərazi Dairəsi ərazisində növbəti məhəllədə səyyar qəbul keçirmişdir. Qəbulda Moskva pr., Asif Məhərrəmov, Hüseyn Seyidzadə, Hüseynbala Əliyev, Cavadxan küçələrinin əhatəsində yerləşən binaların sakinləri iştirak etmişlər.
Sakinlərdən Bayramova Səbinə, Musayeva Leyli, Məmmədova Lətifə, Mollayev Şahin, Əhmədova Tamilla, İsgəndərli Abbas, Bəşirov Zaur, Ağayeva Gülşən, Məmmədova Yeganə və digərləri bir sıra məsələlərlə bağlı, o cümlədən binanın təmiri, həyətin abadlaşdırılması və işıqlandırılması, binanın fasadındakı naqillərin qaydaya salınması, zirzəminin və kanalizasiya xəttinin təmiri, iş ilə təmin, gündəlik su təchizatı ilə bağlı fasilələrin qısaldılması, dam örtüyünün təmiri barədə müraciətlər etdilər.
Qəbul zamanı sakinlərə vətəndaş məmnunluğunu artırmaq və xidmət keyfiyyətinin yaxşılaşdırılmasının təmin olunması məqsədilə rayon icra hakimiyyəti ilə həm onlayn, həm də yerində görüşlər üçün “Rəqəmsal İcra Hakimiyyəti” https://rih.gov.az portalına daxil olmaqla müraciət etmək, həmçinin təklif və rəylərin verilməsi imkanının olduğu barədə məlumat verildi.
Sakinlər müraciətlərilə yanaşı Nəsimi rayonunda, xüsusilə mikrorayonlarda, aparılan quruculuq, abadlıq işlərindən razı qaldıqlarını və görülən işlərə görə Möhtərəm Prezidentimiz cənab İlham Əliyevə minnətdarlıqlarını bildirmişlər.
Müraciətlərlə bağlı qəbulda iştirak edən rayon İcra Hakimiyyəti Başçısı Aparatının, Mənzil-Kommunal Təsərrüfatı Birliyinin, kommunal xidmət sahələrinin məsul şəxslərinə müvafiq tapşırıqlar verilmişdir.
