Nəsimi rayonunda 26 İyun - Silahlı Qüvvələr Günü münasibətilə hərbi orkestrlərin iştirakı ilə yürüş keçirilib.
26 İyun - Silahlı Qüvvələr Günü münasibətilə paytaxtın müxtəlif yerlərində olduğu kimi Nəsimi rayonunda da hərbi orkestrlərin nümunəvi çıxışları olub.
Hərbi orkestrlər müəyyənləşdirilmiş yerlərdə Heydər Əliyev Sarayının qarşısında, Zabitlər parkında, Koroğlu parkında çıxışlar ediblər.
Orkestrlər hərbi vətənpərvərlik mahnıları, qələbə marşları, Azərbaycan və dünya bəstəkarlarının tanınmış müasir, estrada və klassik musiqi əsərlərindən parçalar səsləndiriblər.
Hərbi orkestrlərin ifa etdikləri musiqi əsərləri şəhər sakinlərinə və paytaxtımızın qonaqlarına xoş ovqat bəxş edib və böyük maraqla dinlənilib.
Qeyd edək ki, həmçinin hərbi orkestrlərin və hərbçilərin nümunəvi çıxışları və yürüşləri təşkil olunub. Hərbi orkestrlər Nəsimi rayonu üzrə Heydər Əliyev Sarayı, Bülbül prospekti, Nizami Kinoteatrı, Zabitlər parkı, Milli Sirk, Səməd Vurğun küçəsi, Neftçilər prospekti, Qış parkı və Mərkəzi Bank istiqaməti üzrə də yürüş ediblər.
Yürüş edən hərbi qulluqçular vətəndaşlar tərəfindən alqışlarla qarşılanıb.
