Nəsimi rayonunda Beynəlxalq Əlillər Günü münasibəti ilə “Tut əlimdən” adlı satış sərgisi keçirilib.
3 dekabr Əlillər günü ilə əlaqədar Nəsimi rayonunda fəaliyyət göstərən 1 nömrəli Uşaq-Gənclər İnkişaf Mərkəzinin Təsviri Sənət Qaleriyasında sağlamlıq imkanları məhdud uşaqların əl işlərindən ibarət “ Tut əlimdən” adlı satış sərgisi keçirilib.
Tədbirdə Nəsimi Rayon İcra Hakimiyyətinin, Azərbaycan Respublikasının İnsan Hüquqları üzrə Müvəkkili Aparatının, Azərbaycan Respublikasının Ailə, Qadın və Uşaq Problemləri üzrə Dövlət Komitəsinin məsul əməkdaşları və rayon sakinləri iştirak ediblər.
Sərginin keçirilməsində məqsəd gənc nəslin istedad və bacarıqlarını üzə çıxarmaq, xüsusi qayğıya ehtiyacı olan uşaqların cəmiyyətə inteqrasiya olunmasına və inklüziv təhsil sisteminin inkişafına şərait yaratmaqdır.
Ölkəmizdə xüsusi qayğıya ehtiyacı olan insanların sosial və ictimai həyata inteqrasiya olunması üçün Ulu Öndər Heydər Əliyev tərəfindən bir sıra addımlar atılmışdır. Belə ki, “Sağlamlıq imkanları məhdud şəxslərin təhsili (xüsusi təhsil) haqqında” Azərbaycan Respublikasının Qanunu, “Əlilliyin qarşısının alınması, əlillərin reabilitasiyası və sosial müdafiəsi haqqında Azərbaycan Respublikasının qanunu” kimi qanunlar bu qəbildən olan uşaqların şən və firavan yaşamasına xidmət edir. Bu baxımdan xüsusi qayğıya ehtiyacı olan insanların digər insanlardan fərqlənməməsini, onların cəmiyyətin bərabər hüquqlu fərdləri kimi yaşamasını, cəmiyyətə inteqrasiya olunmalarını təmin etmək, komplekslərdən qurtulmalarına çalışmaq hər birimizin borcudur. Bunun üçün mütəmadi olaraq bu insanlarla ünsiyyətdə olmağa, onlara mənəvi cəhətdən yardım göstərməyə, daima dinləməyə və anlamağa çalışmaq lazımdır.
Tədbirdə əvvəlcə Azərbaycan Respublikasının Dövlət Himni səsləndirilmiş, sonra xüsusi qayğıya ehtiyacı olan uşaqların əl işlərindən və mərkəzin sağlamlıq imkanları məhdud uşaqlar üçün “Musiqi dünyamız” adlı dərnəyin üzvü Ceylan Məhəmməd Hüseyn oğlunun fortepianoda solo konsertində ifa etdiyi mahnılar səsləndirildi.
Tədbirdə dərnək üzvlərinin iştirakı ilə suvenirlər, xalçaçılıq, tikmə və toxuma nümunələri, rəsmlər, bəzək əşyaları və aksesuarlar və s. nümayiş edilib.
Tədbirin sonunda fəallıq göstərən dərnək üzvlərinə diplomlar və hədiyyələr verilib. Xatirə şəkili çəkilib.
