Nəsimi rayonunda “Yanğın təhlükəsizliyinin təmin olunmasında Fövqəladə Hallar Nazirliyi, yerli icra hakimiyyəti və özünüidarəetmə orqanlarının birgə fəaliyyəti” mövzusunda rayon müşavirəsi keçirildi.

11 Noyabr  2022-ci il tarixdə Nəsimi Rayon İcra Hakimiyyəti və Fövqəladə Hallar Nazirliyinin Bakı Regional Mərkəzinin birgə təşkilatçılığı ilə “Yanğın təhlükəsizliyinin təmin olunmasında Fövqəladə Hallar Nazirliyi, yerli icra hakimiyyəti və özünüidarəetmə orqanlarının birgə fəaliyyəti” mövzusunda rayon müşavirəsi keçirildi.

Tədbirdə rayonun təsərrüfat rəhbərləri, rayon təhsil, səhiyyə müəssisələrinin, mənzil-kommunal təsərrüfatı təşkilatlarının rəhbərləri, eləcə də, FHN Dövlət Yanğın Nəzarəti və Dövlət Yanğından Mühafizə xidmətlərinin nümayəndələri iştirak etdilər.

Müşavirəni giriş sözü ilə açan Nəsimi  Rayon İcra Hakimiyyəti başçısının müavini Ramiz Quliyev  Nəsimi rayonunda yanğın təhlükəsizliyinin təmin olunması ilə bağlı görülən işlər barədə məlumat verərək, insanlar arasında bu istiqamətdə təbliğat işinin əhəmiyyətindən danışdı.

Bakı Regional Mərkəzinin rəis müavini Kamil Bağırov tədbirin keçirilməsinin  zəruriliyini qeyd edərək fövqəladə hadisələr zamanı insanların təhlükəsizliyinin təmin edilməsinin əsas vacib məsələ olduğunu bildirmişdir. Daha sonra Nəsimi rayonunda 2022-ci ilin müvafiq dövründə baş vermiş yanğın hadisələrinin  statistikası barədə  məlumat verilmişdir.

Çıxış edən iştirakçılar “Yaşayış massivlərində yanğınların başvermə səbəbləri, potensial təhlükələr və onların aradan qaldırılması yolları”, “Yanğınların söndürülməsi prosesində qarşıya çıxan problemlər və onların həlli yolları, “Rayonda enerji təchizatının mövcud vəziyyəti, problemlər və həlli yolları”, “Yaşayış binalarında yanğın təhlükəsizliyinin  təmin edilməsi ilə bağlı görülən işlər və mövcud problemlər ”, Yanğın zamanı ilkin tibbi yardım” və baş vermiş yanğın hadisələri zamanı ictimai asayişin təşkili mövzularında ətraflı məlumat verdilər.

Tədbir zamanı  “Məişətdə yanğın təhlükəsizliyi” və “Dəm qazı” ilə bağlı videoçarxlar nümayiş olundu, suallar cavablandırıldı.

Müşavirənin sonunda aidiyyəti təşkilatlara müvafiq tapşırıqlar və tövsiyyələr verildi.