Ümummilli lider “Heydər Əliyev ili” çərçivəsində “Nizami Gəncəvi yaradıcılığının dünyası” adlı tədbir keçirilib.

Nəsimi rayonu A.Novruzbəyli adına 46 nömrəli tam orta məktəbdə Ümummilli lider “Heydər Əliyev ili” çərçivəsində “Nizami Gəncəvi yaradıcılığının dünyası” adlı tədbir keçirilib.

Tədbirdə Nəsimi rayon İcra Hakimiyyəti Başçısının müavini Zahid Xəlilov, YAP Nəsimi rayon təşkilatının sədri Azər Süleymanov, Nəsimi Bələdiyyəsinin sədri Əziz Zeynalov, Qarabağ müharibəsi əlilləri, veteranları və şəhid ailələri İctimai Birliyin Nəsimi rayon şöbəsinin sədri Azər Quliyev və məktəbin pedaqoji kollektivi iştirak edib.

İlk öncə tədbir iştirakçıları məktəbin foyesində məktəblilərin hazırladıqları sərgiyə tamaşa ediblər.

Tədbirdə Azərbaycan Respublikasının Dövlət himni səsləndirilmiş, sonra Ümummlli lider Heydər Əliyevin və torpaqlarımzın ərazi bütövlüyü uğrunda canlarını fəda etmiş şəhidlərimizin əziz xatirəsi  bir dəqiqəlik sükutla yad edilib.

Tədbiri Nəsimi rayonu A.Novruzbəyli adına 46 nömrəli tam orta məktəbin direktoru Sevinc Budaqova açaraq, qeyd etdi ki, dövlətimizin inkişaf etmiş bütün sahələrinin təməlində Heydər Əliyevin xidmətləri, onun əməyinin, zəkasının, uzaqgörənliyinin izləri var. Bildirildi ki, Ulu Öndərin hakimiyyətə gəlişi ilə ölkədə sabitlik, vətəndaş həmrəyliyi bərpa edildi, Qarabağ müharibəsində atəşkəsə nail olundu, düşmən təcavüzü dayandırıldı.

Natiq çıxışına davam edərək xüsusi vurğuladı ki, universal biliyi, intellekti, dünyagörüşü, siyasi müdrikliyi dövlət başçısı kimi onun ən yüksək şəxsi keyfiyyətlərindən idi.

Sonra məktəblilərin hazırladıqları “Xarı bülbül” rəqsi, “Yeddi gözəl” poeması əsasında hazırlanmış kiçik səhnəçiklər və Ulu öndər Heydər Əliyevə həsr olunmuş şerlər tamaşaçılara təqdim olundu.